यथा रामानुजीयमाध्वादयो द्वैतिनिअस्तथैव नैयायिका वैशेषिकाः साङ्ख्याश्च द्वैतिन एव। शङ्करमिश्राख्यनैयायिकेन भेदरत्नमिति ग्रन्थो द्वैतमण्डनाय रचितः। यथा मधुसूदनसरस्वतीश्रीचरणैरद्वैतसिद्धिर्माध्वानां निराकरणार्थं रचिता तथैव निरुक्तग्रन्थनिराकरणाय तैरेव अद्वैतरत्नरक्षणाख्यग्रन्थो रचितः। “अत्र च एकत्वैकान्ताभ्युपगमे प्रत्यक्षादीनां प्रमाणानां विधिप्रतिषेधशास्त्रस्य च कथमुपपत्तिरित्याद्याक्षेपाः सत्तात्रैविध्यस्वीकारेण परिहृताः। भावरूपाविद्यायाः प्रामाणिकत्वमुपपाद्य तेषां प्रमाणानामदृष्टपरत्वं निराकृतम्। प्रपञ्चसत्यत्वानुमानानि विस्तरेण दूषितानि॥”