ನಮ್ಮ ಗುರುವರೇಣ್ಯರಾದ ಶ್ರೀ ಶ್ರೀ ಚಂದ್ರಶೇಖರಭಾರತೀ ಮಹಾಸ್ವಾಮಿಗಳು ಪರಮಪೂಜ್ಞರೂ, ವಿದ್ಯಾಮೂರ್ತಿಗಳೂ, ಪರಮತಪಸ್ವಿಗಳೂ ಎಲ್ಲರಿಗೂ ಆದರ್ಶಪ್ರಾಯರೂ ಆಗಿದ್ದರೆಂಬುದು ಸರ್ವಜನವಿದಿತವು. ಈ ಮಹಾಮಹಿಮಾನ್ವಿತರ ದಿವ್ಯ ಚರಿತ್ರೆಯು ಹಿಂದಿನ ಜೀವನ್ಮುಕ್ತರೆಂದು ವೇದಾಂತ ಪ್ರಸಿದ್ಧರಾದ ಋಭು, ನಿದಾಘ, ಜಡಭರತ, ಜನಕಾದಿಗಳ ಚರಿತ್ರೆಯಂತೆ ಸಾಧಕರಾದ ಮುಮುಕ್ಷುಗಳಿಗೆ ಜ್ಞಾನೋಪಾಯಗಳನ್ನು ತಿಳಿಸುತ್ತದೆ ಎಂಬ ವಿಷಯದಲ್ಲಿ ಏನೂ ಸಂಶಯವಿಲ್ಲ. ಈ ಚರಿತ್ರೆಯನ್ನು ಓದುವುದರಿಂದ ಸಾಧಕನಿಗೆ ತನ್ನ ಕರ್ತವ್ಯಗಳು ಚೆನ್ನಾಗಿ ತಿಳಿಯುತ್ತವೆ. ಸ್ಥಿತಪ್ರಜ್ಞನ ಲಕ್ಷಣಗಳೆಲ್ಲಾ ಸಾಧಕನಿಗೆ ಉಪಾಯಗಳು ಎಂದು ಶಾಸ್ತ್ರಗಳು ಉದ್ಘೋಷಿಸುತ್ತವೆ.