ಮಾಧವೀಯ ಶಂಕರವಿಜಯವನ್ನನುಸರಿಸಿ ಹಲವರು ಶಂಕರ ಚರಿತ್ರೆಯನ್ನು ಬರೆದಿದ್ದಾರೆ. ಸುಮಾರು 80 ವರ್ಷಗಳ ಹಿಂದೆ ಪಂಡಿತ ಶ್ರೀ ಕೆ.ಆ‌ರ್.ನರಸಿಂಹಯ್ಯ ನವರು "ಶ್ರೀಶಂಕರ ಗುರುಚರಿತಂ" ಎಂಬ ಹೆಸರಿನಲ್ಲಿ ಶಂಕರರ ಚರಿತ್ರೆಯನ್ನು ತಿಳಿಗನ್ನಡದಲ್ಲಿ ಬರೆದಿದ್ದಾರೆ. ಇದು ಮಾಧವೀಯವನ್ನನುಸರಿಸಿ ಬರೆದ ಗ್ರಂಥ. ಈ ಗ್ರಂಥಕರ್ತರಿಗೆ ಕನ್ನಡದಲ್ಲಿ ವಿಶೇಷವಾಗಿ ಪ್ರಭುತ್ವವಿತ್ತು ಎಂಬುದು ಇದರಲ್ಲಿರುವ ಕವಿತೆಯಿಂದ ಸ್ಪಷ್ಟವಾಗುತ್ತದೆ. ಇವರಿಗೆ ಶೃಂಗೇರಿ ಶಾರದಾ ಮಾತೆಯಲ್ಲಿ ವಿಶೇಷವಾಗಿ ಬ್ರಹ್ಮೀಭೂತ ಜಗದ್ಗುರು ಶ್ರೀಚಂದ್ರಶೇಖರಭಾರತೀ ಮಹಾಸ್ವಾಮಿಗಳವರಲ್ಲಿಯೂ ಶ್ರದ್ಧಾಭಕ್ತಿಗಳಿದ್ದವು ಎಂಬುದು ಈ ಗ್ರಂಥದ ಆದ್ಯಂತ ಪದ್ಯಗಳಿಂದ ಸ್ಪಷ್ಟವಾಗುತ್ತದೆ.